Pampasiglang Gabay sa mga Pasahero ng Bus sa Biyaheng Earth - Ang buhay natin ay parang isang "bus ride." Maraming sasakay, maraming bababa; mayroong magtatagal, mayroong panandalian lamang at lilisan na rin agad. Ngunit kung susuriin natin, bawat pasaherong sasakay sa bus ng ating buhay ay may mensaheng dala at may kahulugan sa ating buhay gaano man ito kalaki o kaliit. Mayroong sa pagsakay pa lamang ay magpapangiti na sa atin. Mayroon namang sa unang hakbang pa lamang ay magpapakulo na sa ating dugo at tila gusto na nating itulak pababa. Mayroon din namang sasakay ng diretsong biyahe, kasama natin sa buong paglalakbay. Hindi bababa kailanman sa biyaheng tinatahak natin maliban na lamang kung dulo na ito ng biyahe ng buhay. Mayroon din namang sasakay na tila pagsasamantala lamang ang hangarin. Ayaw magbayad at bagkus ay sapilitan pang kukuhanan tayo upang sa pagbaba nila ay sila pa ang nakalamang. Hay naku Mahirap pumili ng pasaherong sasakay sa bus ng ating buhay. Kusa kasing sumakasakay ang karamihan sa mga pasahero, parahin man natin o hindi ang ating sasakyan. Ngunit ang sigurado, bawat pasahero ay may ituturo sa ating aral sa buhay. Na dapat nating suriin.